Liäbä GOTT.
Mir chömmed zu Dir,
um üs ganz und gar mit Dim HEILIGÄ GEISCHT
uffüllä z'loh.
So mängisch i üsem Lebä stosse'mer a Grenzä,
und chönnd eifach kein guetä Weg meh g'seh.
Mängmol hämmer grossi Ängscht vor dä Zuäkunft,
wiä's echt no wird usä'cho
mit üsnä Chind und Enkel, mit üserä Partnerschaft,
a üsem Arbetsplatz,
ob mir echt chönnd g'sund bliibä oder
wieder g'sund werdä,
und ob mir das alles, was üs uferleit isch, chönnd schaffä.
Mir händ au Ängscht um üses Land, um dä Friedä,
und um üsi Identität,
wo immer meh und meh verlorä goht.
Und soo viel Frogä und Gedankä gönd üs täglich durch dä Chopf.
JESUS, bitte nimm üs ad'Hand, ganz nöch a Dis Herz,
und zeig üs dä richtig Weg
i jederä Situation vo üsem Lebä!
Bitte sprich ganz dütlich zu üs und i üs,
damit mir's verstönd,
und s'Richtige mached und entscheided,
s'Richtige säged und wirked!
Üses Herz und üses Lebä
möchte'mer Dir wieder ganz neu hii'geh,
und Dir alles vo üs und um üs überloh.
Sende us, Din HEILIGÄ GEISCHT,
und fülle üs ganz und gar uf!
Jedi Zellä vo üsem Körper söll Dir g'hörä.
Tuä alles weg,
leer alles us, was chrank und schlecht isch!
Befreie üs bitte vo allnä Altlaschtä,
vo allem Belaschtendä i üsem Bewusstsii,
und fülle üs neu und ganz mit Dir!
Du, heilbringendä, wiissä,
glücklich machendä HEILIGÄ GEISCHT GOTTES,
dörfsch und söllsch ellei
i all üsnä Zellä sii, i allnä Körperfunktionä,
i üsem Denkä und Fühlä.
Du bisch üsi Chraft
für alles, wo mir säged und mached,
für üsen Körper, Geischt und Seel.
Alles i üs söll wiiss sii, sanft, ruhig und sicher,
so, wiä Du, liäbendä GOTT!
Alles i üs söll voller Friedä und Glück sii,
mit'erä über alles grossä
Dankbarkeit und Liäbi gegenüber Dir!
Chumm HEILIGÄ GEISCHT, für immer und ewig!
Amen
Daniela Eberle
Jesus wir bitten DICH!
